本性如此！

故事大家可能都聽過 :

從前有一隻蠍子要過河，請青蛙背佢過河，青蛙答應左，但條件係蠍子唔可以咬佢，否則會未過完河就大家一齊死。結果在過河嘅時候，蠍子螫左佢一下，中毒的青蛙沈入河底前反問就黎浸死嘅蠍子：「點解要咁做？」，蠍子答：「本性如此。」

故事本來解，青蛙太天真，蠍子太毒同無理，叫人唔好見利忘義，又唔好太天真，其實唔係咁解。

首先青蛙其實唔係太天真，青蛙係明知蠍子有毒同本性係會咬人，但係錯在用左青蛙自己睇法黎睇蠍子，青蛙覺得自己識游水，無所謂，無疑青蛙係太仁慈，想幫人，橫掂自己都可以過河載佢無問題，過左河亦覺得自己可以走得切，只係覺得自己幫佢過河，佢唔會咁蠢打沈自己隻船，更唔會為左咬佢一啖咁少利益而河都未過完黎做出損害自己長遠利益嘅事，因為青蛙睇嘅係長遠利益嘅觀點。但係在蠍子眼中，蠍子只係利用青蛙過河，青蛙肯幫佢係青蛙傻，抵佢死，而點解要咬，有好多可能性，可能蠍子一早已經睇青蛙唔順眼，但蠍子係會死喎？ 咁又點，蠍子覺得一切生物都係要黎食，有機會咬唔咬一啖就係對唔住自己，蠍子有無錯？都無，因為蠍子嘅觀點係短線，因為蠍子覺得生存在現在最緊要，只要有眼前利益，點都唔好放過先！未到岸？ 無所謂，咬左先講！

其實唔只蠍子係"本性如此"，青蛙都係，在蠍子眼中無錯， 在青蛙眼中都無錯，兩個都都只係做返自己，呢個故事好有意思！

無名劍
www.facebook.com/nonamesword