2015年9月7日 星期一

減肥必勝法 。。。一心篇!

無名劍繼震古鑠今嘅股市必勝法後,又一嘔心甩肺力作! 

nonameoldstory.blogspot.hk/2014/08/blog-post_15.html?m=1

減肥必勝法!

減無必瘦, 其必瘦者法也!一曰心, 二曰道, 三曰恒, 心, 道, 恒三者不可缺一也。

上面呢幾句係老翻"股市必勝法"頭段,其實股市必勝法根本係萬事必勝法!即凡事都係由心開始,你嘅心思意念已經定左你會否成功。道係方法,要揾自己方法,唔係靠人嘅方法。恒就係恒心,有恒者萬事必行。 

其實呢篇主要唔係想講減肥,只係想講自己想改變一下,講下自己嘅過去同心路歷程。好長可能好悶。但寫咁長係想比有心減肥唔成功嘅人一個借鏡,希望有用。 裏面亦有D我嘅背境,點解無名好似成日都咁堅持,下下打必還手,駡必還口,因為師父教我地,人地打你左邊,你就打返人右邊,打唔到右邊,就打返人左邊,又有人話點解有人話無名可以咁"勁"trade 得咁快, 其實唔係勁,都只係練得多,慣左,同我嘅過去有關。

無名少年時係個武痴,曾經學過跆拳道,遇上一位好好嘅魔鬼教練,佢可能係當年最勁嘅一位跆拳教練,佢係韓國黑帶五段,當年都有黑帶五段,但正宗韓國清濤館嘅黑帶五段香港應該無幾多個,呢位魔鬼教練操人唔係人咁品,無名帶過兩個朋友去玩,一個學界田徑揾過獎,一個玩開體操,兩個人第一堂都一樣,面青口唇白加休克。

當時係一,三,五,日練拳,二四六游水或跑步,每日幾百掌上壓, 幾百下sit up.  Sit up 係up 一下"中"一拳,為左練捱打,係兩個人一人一腳,互"嘔"對方肩頭手臂腹部背脊,基本上普通人打我地全身(除左唯一要害同個頭) 都無咩感覺。當時要練輕身同爆炸力,係要跳繩一下條繩轉四轉, 掌上壓推起拍四下手掌,游水係一啖氣蝶式到浮台。當時打比賽前係減到 112 磅打feather weight 羽量級,師父想我減到 109 打 fly weight 蠅量級, 但真係已經無咩好減,得返D肌肉同棚骨,減唔到。當年女朋友問我點解鎖骨上有兩個"dou"形嘅"番梘盒",無名答"一個用黎載梘液,一個載洗頭水",  都幾攪笑!

由於運動量大,無名食量係驚人,基本上係一日七到九餐,係正常男人1.5 至兩倍,但食極都係面無四兩肉,當年真係同女朋友吵過大鑊係為左我成日要去食野,但後來無打拳,體重回到正常水平係 130磅,但都係幾瘦。不過人大左,食量都無咁點減,漸漸就由130,140,150...最高去到 168... 死未! 

其實以前咁好體能咁fit, 到左咁重,無名覺得自己好似著左件衫咁,結果自己減少左少少食量到一個正常人水平,體重先回落到155- 160 水平橫行 ! 唔算係肥,但就唔係fit.

到最近,遇到等待一生嘅濤天巨浪,令無名對人生有所反思,人生重可以等多幾個咁嘅巨浪? 點解唔用最好狀態去過往後日子,唔好到人生去到盡頭先覺得自己有野無做最好。於是先"的"起心肝減肥,第一樣想做嘅係唔想食咁多野,因為其實自己一早已經覺得自己食唔落咁多野,而且近一年識左基哥(一位低調高手),  佢同我講左好多佛理,無名覺得好好,佢教無名人生可以係"淡泊如水",  同埋無名一直都唔鐘意殺生,屋企捉到嘅昆蟲同壁虎,無名都係攞出屋外放生。屋企人話無名無謂,但無名覺得,自己無份創造佢,點解有權毀滅佢呢?於是就開始左食齋,但唔係全齋,因為無名有時都要見人食飯,如果下下要人就你,會好無癮,所以係一個人嘅時候就食全齋,同人食就盡量少食肉,發覺其實唔難。 相反,覺得個人好似輕鬆左,無左一罪孽感,其實無名近年行過街市,都會覺得好嘔心,D豬牛切開一件件,內藏掛住出黎,無名幻想如果係人咁點? 點解人有權食動物? 如果有一種動物比人聰明,掛出黎嘅就係人肉,如果佛家講嘅輪迴論係真嘅,今世我食你,下世你食我,咁又何苦呢? 其實食肉嘅邏輯都幾有趣,即係有隻豬在你旁邊,你同隻豬講,唔好意思,睇落你隻脾生得好正喎,我想咬一啖做瓜你食左佢呀! 

另外,無名睇左一D關於環保嘅資料,全球破壞森林最嚴重嘅原因唔係人口增加所以唔夠地,唔係用紙太多,而係因為人係食肉,畜牧業其實係全球最大嘅森林殺手,因為人類對肉食要求日增,好多森林都改變成為提供草比畜牧業,變相殺死左好多野生動物,如果每人都食少D肉,咁森林就可以無咁快消失, 可以救返好多眾生。 

無名就係咁開始左在自己一個嘅時候食齋。早上,由豬牛雞扒煎蛋,改為一果蘋果,感覺唔會個肚脹住,重好清新。下午去食麵,晚上無名都係多數自己一個人在屋企食,有時係食幾隻雞蛋又一餐,或者一個蝦子麵加一隻蛋,係完全唔覺得難食,一滴油都無落,食完洗碗都唔洗用洗潔精,一沖水就掂。其實食咩對無名黎講無咩分別,無名習慣左孤獨,大部份時間都係一個人食,食咩都一樣,同咩人食先重要。而食量係少過未開始前嘅一半, 同以前食肉獸嘅我, 幾日內變左兩個人,過左七日之後,已經由之前158減到151, (158 磅係以之前在機場影係71.6kg, 約158黎定,圖中見到無名手臂比老鼠仔粗,其實發力係手臂,一般人以為老鼠仔粗就大力係錯),  跟住14日後嘅今日已經係 147.8 創幾年新低, 14日減左約十磅,而中間無名係無咩做過運動。呢個係phase 2. 

上面講咁多其實都係想講,食量大如無名,原來都可以將食量減半,同埋一切都由心開始, 萬法乎心,心動即可行。如果你個心未ready, 唔convince 去做一件事,你點迫自己去做,比錢,揾營養師,定餐單, 買瘦身療程。。。。都係多餘。你個心未得,就咩都唔得。只要心意堅定,就咩都得,即係無名所講嘅 "若能以心成劍,則萬馬千軍在前,手無吋鐵而不懼已!"

呢篇係講"心"嘅一心篇,  重有行道,同持恒,太長,再寫!

呢條路同無名以前尋劍嘅路一樣都係好孤單,但都有一班股友講下,呢條路就完全無人支持無名咁做,只有自己,所以更加孤單,今日係 : 孤單的路 - 第14日。 


無名劍
www.facebook.com/nonamesword

沒有留言:

張貼留言