翠華奶油豬重脆唔脆？

無名自從在翠華上市前唱好過翠華奶油豬之後， D人就好似當左無名係奶油豬食家咁， 成日問無名翠華奶油豬幾時食得？ 記得翠華上市之前，大部份專家財演都話佢上市以上限定價PE太貴， 攞左D數出黎左分析右分析， 無名連一隻字都無睇過， 就話 : 

奶油豬應該值幾錢？

無名可以肯定今次個奶油豬有得炒, 今日最少點都升一成,即2.5樓上, 短線高位可到3以上, 上限3.3. 

但始終都要跌鑊金, 要買長線都要等等先.

**************************

結果， 第一日升大升過1成， 之後好快升破左無名個估計上限3.3, 無名之後調高左目標到4.5-5, 結果都破埋，最高5.75. 跟住"最終要跌鑊金"都出現， 由5.75一路跌到3.3水平， 下跌原因一大羅， 但無名覺得主因係主席同大股東在5 減持， 同基金在3.4 左右再減， 咁啱個減持價又好近無名最初估計上限3.3. 一切其實都係預計當中。 

無名一週前在翠華大跌之後一日出過post 話可以以3.3 一注，破3後每跌約0.5加一注 ， 止蝕位在2, 但覺得甚至可以不設止蝕， 同佢同生共死，不過就要長線。 

你可能會話無名如果咩數據都唔睇,睇咩可以咁sure而結果又同似有跟據咁呢. 其實無名在創富雜誌都講過無名獨門價勢投資法係唔洗睇數據, 只要識睇趨勢就得, 睇趨勢有好多方法, 但無名今日想講嘅唔係趨勢點睇, 而係點睇一門生意好唔好, 同佢在市場生存空間. 

以翠華為例, 算係中上價快餐, 一個人每次無名估計會洗50-100左右 (無名又係估, 無睇過report), 比起平價快餐大家樂, 大快活, 好似貴左一倍有多. D大XX就大約由25 - 50 左右, 現在地價貴, 即係每個客嘅地價成本都高左, 對平價快餐其實不利, 即係話就算翠華D租貴大XX 一倍, 翠華都可能比大XX有利. 因為翠華賣貴一倍可以抵消地價, 但食物成本呢就應唔洗多一倍. 咁即係話翠華在高地價環境會比平價餐對手賺錢能力高左.

咁跟住睇其他同價對手, 無名分兩種, 一種係好似太興咁連鎖店, 第二種係細間有特色小店. 先講小店, 同樣在高地價環境, 小店就死下一間少一間, 變相比連鎖店食左佢地生意. 但連鎖店當中無名覺得只有太興係佢對手, 大家相比之下, 無名主觀地覺得翠華好DD. 主要係佢選擇多D, 平D同貴D都有， 質數就覺得差唔多， 有人話翠華差左， 無名同意， 做大左就通常無咁好， 但問題係， 佢洗唔洗最好先賺錢呢？ 投資者成日有一個盲點就係去比佢有冇以前咁好， 同係咪最好, 無咁好又點？ 記住一門好生意唔洗一定好似iPhone 咁樣樣都完美咖， 只要"夠好"就得， 即係optimal,  not the best.  太多投資者甚至專家財演都話佢數據差左， 但無名覺得"夠好"就得， 點為之"夠好",  一就係你入去食完會返轉頭(無名會),  二係多數時間滿坐。 就係咁簡單就夠。 好多財演一係講到佢垃圾一樣，一係話未夠平， 等海嘯價， 無名覺得買股唔係買菜， 見菜心今日唔平， 第日先食， 如果係好野就要買， 最多分注買， 而唔係等等等， 無名講過N隻爆升股700, 759, 6889, 1319, 993, Google, Apple,  好多人無買，無名問佢點解？ 都係一句 : 我想等平D呀嗎！"

正係咁多人睇淡， 無名覺得重正， 贈佢地幾句 :

好股唔怕買，只怕買唔晒！
好價無盡頭，升左無回頭！ 

無名劍
www.facebook.com/nonamesword
請like fanpage 接收無名每日大市個股分析