古代傳說中嘅后羿射日，后羿見十日明空，射低左九個。現代天文學上，都有九星連珠嘅奇境， 無名呢個思覺失調嘅痴線佬假先知竟然都見到個九劍玄天嘅奇境。 就命名為 :
玄天九劍，逆天而行！
無名首先想講呢篇野唔係想叫你信我， 反而係想叫你唔好信晒我！無名只係想講自己見到嘅野， 而逆天而行正正係無名對所見現象同市况逆向而行嘅感覺！
無名上週豬噏一輪"奇劍奇境"比左個密碼9之後，有網友估過9字點解，又嘗試睇圖揾答案，其實都可以唔洗睇，如果睇圖反而可能睇到想爆上咁，因為都唔關圖事，只係關乎劍仔數，無名只係比個名佢，其他人係唔會明。
環顧四周，都唔太多人睇淡！ 在各國放水嘅前題下， 太多數都覺得上破機會大， 好多網友同專家都話恒指强，要破25300, 因為A股跌，佢都唔跌，無名之前就只講過無極長盈劍向上， 話若24600可守，即有機會到24800 - 25000. 結果係人行降準後一野到25048, 比無名講嘅多左48 點。
呢個比較人地覺得自己强嘅睇法可能啱一半，又可能錯晒。 理由就如你坐在車上行緊上斜坡， 見身邊車向後退，就話： "我地架車幾有力，我地重上緊。"但其實一切都係相對，可以係大家都向後溜， 人地溜得快D,你就以為自己行得比人快， 其實大家用唔同速度向緊後溜。每個股市都有唔同cycle, 雖然有時係同方向行， 大家會覺得大家係互相影響，但其實都可以係大家咁啱都係行緊同一方向，影響唔係無，但單靠咁睇太簡單。講A股其實因為人為操控，已經脫離左正常嘅升跌cycle, 現在你講A股跌，港股唔跟，港股好强，我嘅睇法係，A股本來升得太多一早要回，因為太大嘅人為力量所以遲左， 而A股升左咁多港股只係升少少，所以無咩郁，即係A股遲來的回遇上港股唔多郁。同車上斜坡比喻一樣。
無名今週又講劍聖禦賜25100阿姑免死金牌， 又話"天劍已備", 再講"大跌條件有左". 咁其實係咪好sure呢？ 老實講唔係， 因為咁係"逆天而行", 即係同大圍市况同大眾意願相反，咁機會有幾高呢？正常係低嘅， 咁點解無名要咁"口硬"同咁"嚇人"(有個人咁講) 呢？ 無非都係因為班劍仔咁同無名講，劍仔係我親生仔，又幫過我咁多次，我無理由唔撐佢，但你唔同，你唔係佢老豆，所以唔好信我，要自己判斷。因為股無必勝，自己執生。
但如果中立D黎講，呢個位係唔升唔得，唔跌唔掂， 即係無得停低，而如果劍仔係錯的話，就會錯晒，即係大爆上。
留意埋 388 同 700, 劍仔都話係好難唔跌，佢地會係今次嘅升跌火車頭，若果唔跌，就會好爆！
更要注意第三個可能性係"磨", 最長可能磨到三月，但機會就細D.
今次無名呢個叫"玄天九劍，逆天而行"嘅預測其實無名都覺得幾"逆天而行"同痴線咖！不過痴得黎，你有幾何見人痴得無名咁"雲秦"先，所以今次就算錯左，無名都覺得"雖敗猷榮，雖死猷生！"
呢招就叫做"未跌落地，攞定"咋"沙！" Kakaka!
無名劍
www.facebook.com/nonamesword
奇劍奇境，天意難猜！
大跌條件已備。。。一切由天。
無名好可能係錯， 因為無名未睇過。如果錯左， 就係相反，大爆上。。。。
小心！
無名劍
www.facebook.com/nonamesword
今日， 今週， 今月都係一個奇境，要記住。。。
奇劍密碼 : 9
無名劍
www.facebook.com/nonamesword
話說無名細路時睇過本乜索寓言， 覺得好好睇，去圖書館揾返，見到本"勒索預言", 都差唔多啫，可以已左版用個chok 名想引人注意呢，一睇個故事叫：森林中的"驚要停"機制。。。故事係咁嘅 :
非洲大森林係一個茵茵向榮嘅好地方，各種動物在"公平"嘅物競天擇嘅條件下生活，有一日掌管森林生殺大權但又好小家嘅森林之王召開森林大會， 小家大王話 :
各位森林嘅好朋友，大家好，近日我收到唔少報告，話大家在獵殺同被獵殺嘅時候，發生左好多不必要嘅"意外", 先有長頸鹿走避時撞樹頂攪到扭親頸， 又有美洲豹"定彎"太急"絞柴", 再有肥河馬走避太急時"冼呔" 撞樹即死！
為左保障各位森林老百姓嘅"生命安全", 本大王今日宣佈實行一個"驚要停"機制，即係當獵食者追到被獵食者嘅10米內，雙方都要停五分鐘，作為"冷靜期", 冷靜期間大家除左唔可以行之外，做咩都得，被獵食者可以坐下，飲杯茶，食個包補充身力。如果被獵食者覺得自己都係唔掂，就可以利用呢"寶貴五分鐘", 同親人道別，交帶定身後事，甚至做個死前領洗都重得，然後可以"安樂"咁離開。。。。至於獵食者，就可以"鬆下根", 睇定條路，諗清楚用咩姿勢咬落去最入肉, 等被獵食者死得"痛快D", 唔洗作無謂嘅"爭扎", 咁就死都死得"安樂"啦！成個機制無"偏幫"任何一方，因為大家都係唔可以行，同時間一樣，所以十分公平，又可以令大家唔洗咁"驚", 正所謂"殺得開心，死得安樂", 你地話我呢條係咪"絕世好橋"呢？
講完引來一陣"車。。。" 跟住老班馬好勞氣咁話 :
佢地D獅子老虎美洲豹出左名係短跑好手，你比佢"抖下", 即係比佢有力跑遠D殺我地啫，咁你不如叫我地唔好走自動獻身啦！
大王回答 :
老班馬，記唔記得你老友上星期就因為近距離比隻老虎一嚇，跑都唔洗跑就心臟發瓜左，如果有呢五分鐘"冷靜期"佢都唔洗驚到咁"慘死"啦，重有呀，佢死前因為無交帶佢D"身家"收埋邊度，攪到佢老婆跟佬走左喎，老班馬好似你個老婆都好後生靚女咖喎！？
老班馬 : 咁又好似啱。。。。
跟住，羚羊仔有野講 :
佢地老野就要講身後事啫， 我地D90後無樓無車無cash 要你果五分鐘黎做咩？ 你比多五分鐘佢地睇清楚條路，即係叫我地死快D啫！ 我有氣有力怕咩同佢"鍊"過？
大王咁答 :
你老表世界記錄羚羊跑手夠有氣有力啦， 點知佢比美洲豹追時，一時睇錯路，彈左落河，跌左落大鱷個口，本來佢咁跑得係唔洗死咖，如果可以用果五分鐘"冷靜"下，睇下路，就唔洗死得咁"無謂"啦！
羚羊話 : 咁佢又真係死得好"無謂"嘅！
跟住， 牛頭角水牛師奶有野講 :
你班老奸巨猾唔好厄我地班師奶唔識野喎！話就話大家都唔可以行，時間一樣，表面上好似公平咁，但係你地班吸血鬼成班友成日"打龍通", 你地一早收買晒班秃鷹幫你地睇水咖啦，你地收風多過我地N陪啦，有咩事"wow"一聲就可以叫"人"做野，我地邊有呀？ 講起D秃鷹就憎咖啦，正小家種黎！
大王 :
牛太，咁要問你平時得閒做咩先？ 你D親朋戚友死左，有冇話"考敬"下秃鷹先？ 平時唔莊香，神仙都唔幫你啦！
牛太 : 我地死左都想留條全屍啦，鬼會"考敬"佢地咩？
大王 :
好啦，相信我地已經有左"共識", "驚要停"就咁通過。
故事完左，但未講完。。。下篇再講。。。。
無名劍
www.facebook.com/nonamesword
